കിഴക്കൻ മലയോര പ്രദേശമായ പത്തനാപുരത്തിൻ്റെ ആത്മീയ പൈതൃകത്തിൽ അനല്പമായ സ്വാധീനം ചെലുത്തിയിട്ടുള്ള ക്രൈസ്തവ ദേവാലയമാണ് മാർ ലാസറസ് ഓർത്തഡോക്സ്‌ വലിയപള്ളി. മലങ്കരയിൽ അത്യപൂർവ്വമാണ് മാർ ലാസറസിൻ്റെ നാമത്തിലുള്ള ദേവാലയങ്ങൾ. പുതിയ നിയമത്തിൽ കർത്താവിൻ്റെ സ്നേഹിതൻ എന്ന് വിശേഷിപ്പിക്കപ്പെടുന്നതും മരിച്ചവരിൽ നിന്ന് ക്രിസ്തു ഉയർപ്പിച്ചവനും പാരമ്പര്യമായ വിശ്വാസം അനുസരിച്ചു സൈപ്രസിലെ KITION എന്ന സ്ഥലത്തെ ബിഷപ്പുമായിരുന്ന മാർ ലാസറസിൻ്റെ നാമത്തിൽ സ്ഥാപിച്ചിരിക്കുന്ന ഈ ദേവാലയത്തിനു അതിൻ്റെ കാവൽ പിതാവിനെ പോലെ തന്നെ മരിച്ച് ഉയിർത്തെഴുന്നേറ്റ ചരിത്രം ആണ് ഉള്ളത്. പത്തനാപുരത്തെ കുടിയേറ്റ ക്രൈസ്തവ കുടുംബങ്ങളുടെ പരിശ്രമഫലമായി രൂപംകൊണ്ട മാർ ലാസറസ് ഇടവകയുടെ ചരിത്രം ആത്മീയാഭിവാഞ്ചയുടെ ചരിത്രം കൂടിയാണ്.